Il «clom», il canzunari ecumen ei cumparius
Da Tschuncheismas 2026 han quater pleivs en Sur- ed en Sutselva envidau alla vernissascha dil cudisch da cant «clom» (Mustér, Vella, Ziraun, Sagogn). Quei niev mied remplazza igl Alleluja ed il Cudisch da chorals. Suenter decennis eis ei stau uras d’adattar texts e da «modernisar» canzuns. Quella lavur han ils dus meinaproject Andri Casanova e ser Jan-Andrea Bernhard fatg. Cu els hagien surpriu il pensum dil Decanat Surselva e dalla Fundaziun Anton Cadonau pil romontsch en baselgia hagien els buca sminau conta lavur che spetgi. Il teolog catolic ed il teolog reformau han instradau avon nov onns in’ovra da piunier. Els sezs ein denton buca stai persuls, mobein han astgau collaborar cun ina squadra da varga 40 persunas.
Il co-meinaproject ser Jan-Andrea Bernhard accentuescha denton: «Igl ei buca nossa ovra, mobein in’ovra per dar laud a Diu.»
Ulteriuras infos e maletgs sut:
www.clom.ch
Ils dus meinaproject culla representanta dil cantun Grischun, presidenta dil cussegl grond, Valérie Favre Accola, a Ziraun.
„Clom“: in canzunari ecumen
Mintga cudisch ha in tetel, e cun quel san ins identificar tematica e cuntegn. Seigi lu in roman, in cudisch dil fatg, da scola, da cuschinar ni auter. En connex cul cant da baselgia en Surselva enconuschan ins generalmein dus tetels: igl Alleluja ella baselgia catolica, ed il cudisch Canzuns choralas ella reformada. Omisdus han liunga tradiziun ed influenza ella cultura da cant. Gl’onn proxim vegnan quels dus tetels uni. Il Decanat Surselva e la Fundaziun Cadonau pil romontsch en baselgia ein vidlunder da scaffir in canzunari ecumen.
Gronda honur per ser Martin Fontana
Il rectur dalla universitad da Turitg, prof. dr. Michael Hengartner, culs novs docters h.c., denter auter era ser dr. Martin Fontana.
A caschun dil 185avel anniversari dalla Alma mater Universitatis Turicensis ei ser Martin Fontana da Flem vegnius undraus cul docter h.c. per siu engaschi da varga 50 onns sco translatur dalla Bibla en Romontsch sursilvan. Sco giuven plevon da Castrisch e Riein ha ser Martin redigiu ils emprems texts dil Veder Testament ed ediu quels ils 1967 ensemen cun ser Peter Paul Cadonau (1891–1972) da Vuorz. Da ser Martin Fontana, fegl dil poet Gian Fontana (1897–1935), ei dacuort era siu cudisch „Denter las alas“ cumparius.
Vernissascha dil tierz tom dalla nova translaziun sursilvana (2014), ils 21 da november 2014 a Glion
Translaziun ecumena dalla Bibla
L’incumbensa principala dalla fundaziun ei dapi ils onns 1960 il sustegn e la promoziun dalla nova translaziun ecumena dalla Bibla sursilvana. Il november 2014 ei il tierz tom da quell’ ovra dil tschentaner vegnius edius.
Sper quella lavur zun honoreivla ei la fundaziun s’engaschada en connex cun stampas religiusas sco cudisch d’uraziun, cudisch da cant ni mieds dall’instrucziun ecclesiastica. Plinavon sustegn la fun
daziun giuvens plevons e plevonessas che duein emprender il romontsch sursilvan per lur lavur ellas pleivs dallas valladas renanas.
Bündner Tagblatt, 24. November 2014